Golaha Ammaanka ee QM, ayaa xalay ansixiyey Mashruuc Qaraar oo u fasaxayo Maraakiibta dagaalka ee shisheeyahaya inay geli karaan Baddaha dalka Somalia, si ay ula dagalamaan Kooxaha burcad-baddeedda khatarta ku haysa Maraakiibta ku socdaasha Baddaha Somalia.

15-ka xubnood ee Golaha Ammaanka ee QM, ayaa si wadajir ah ugu codeeyey Qaraar tirsigiisu yahay 1816, kaasi oo u oggolaanayo Dowladaha shisheeyaha inay ku geli karaan xuduud-baddeedka dalka Somalia, si ay uga hortagaan, ula dagaalamaan, una soo qabtaan Burcad-baddeeda khatarta ku haysa Maraakiibta shisheeyaha ee isticmaasha Baddaha Somalia.

Hindisahaasi oo ay Dowladaha Faransiiska iyo Maraykaanka soo gudbiyeen, ayaa waxa uu awood u siinayaa inay Dowladaha shisheeyaha muddo lix bilood ah kala shaqeeyaan DFKMGS sidii looga hortegi lahaa Burcad-baddeeddaasi, isla markaana ay Maraakiibtaasi u gelbin lahaayeen Maraakiibta Shixnadaha Samafalka u wada Ummadda Soomaaliyeed.

Qaraarkaasi, ayaa waxa uu qeyb ka yahay Codsiyo ay DFKMGS iyo Xoghayaha Guud ee QM, Ban Kii Moon ku codsadeen in taageero laga geysto sidii looga hortegi lahaa Burcad-baddeedaasi.

Golaha Ammaanka ee QM, waxa uu ugu baaqay Dowladaha ay Maraakiibta dagaalka iyo Diyaaradaha ka jooga meel ka baxsan Xeebaha dalka Somalia inay u feejignaadaan falalka burcad-baddeedka, iyo inay DFKMGS iyo Hay'adaha Caalamiga siiba Hay'adda Baddaha Caalamka ee IMO kala shaqeeyaan sidii loo ugaarsan lahaa Burcadda ka qowleysata Baddaha dalka Somalia.

Qaraarka, waxaa kaloo lagu xusay inuu Golaha Ammaanka ee QM walaac xooggan ka muujinayo cabsida falalka Burcadnimadda iyo dhaca hubeysan ee lagu soo qaadayo Maraakiibta iyo khatarta la gelinayo sidii Kaalmooyinka Samafalka loo gaarsiin lahaa dalka Somalia iyo Maraakiibta Ganacsiga ee Caalamka.

Dhinaca kale, Madaxweynaha DFKMGS, C/llaahi Yuusuf Axmed oo shalay xubnaha Golaha Ammaanka ee QM kula kulmay dalka Jabuuti, ayaa sheegay in arrimaha Burcad-badddeed tahay muhiimadda ay DFKMGS siinayo si wax looga qabto iyadoo Beesha Caalamka gacan wada-shaqeyn laga helayo.

Madaxweynuhu, waxa uu ku booriyey QM inay soo dedejiyaan ciiddamaddii wax ka qaban lahaa burcad-baddeeddaasi.